محطة: نادي السكة
الراوى: أ/فاطمة عبد الباسط - راكبة سابقة للترام
لما اشتغلت شغلي أول وقت ابتديت اخرج للمجتمع المدني وابتديت اعمل ورش وأنشطة مع الأطفال كنت بعمل حاجة مع الكشافة وخصوصاً مع بتوع ذوي الاحتياجات الخاصة فكانوا عاملين يوم في نادي اسمه نادي السكة تقريباً في مصر الجديدة هو عنده الترام بيعدي من عليه فالمكان كنت اول مرة اروحه، خرجت اليوم دا نفذت اليوم كله مع الأطفال في المكان وخرجت من هناك فكان معايا زميلي في الشغل وأول ما شوفت الترام انبهرت وأنا بقى ايه مافيش خروج وحياتي كلها ولا بروح ولا باجي و مبعملش اي انشطة وأول ما خرجت وشوفت الترام قولت "ايه دا يا جماعة هو انا دخلت في أفلام أنور وجدي ويوسف بك وهبي" وأنا بحب الناس دي جداً وفجأة عارف "حسيت ان انا في فيلم ابيض واسود والشوارع فاضية قولت الله طب ماهو حلو اهو" ، المهم فركبنا الترام ومن كتر منا كنت معجبة بالموضوع جداً قولتله بص انا مش عايزة اروح ممكن نفضل رايحين جايين كدا فدي كانت أول تجربة ليا مع الترام وأبتديت بقى استكشف كمان منطقة مصر الجديدة"